റൊണാൾഡ് കൂമനെ പുറത്താക്കിയ ബാഴ്സലോണ പകരക്കാരനായി മുൻ ഇതിഹാസ താരവും കൂടിയായ സാവി ഹെർണാണ്ടസിനെ കൊണ്ടുവന്നു.
സാവി ഹെർണാണ്ടസ് എത്തിയതിനുശേഷം ടീമിൽ അടിമുടി മാറ്റങ്ങൾ ഉണ്ടാകും എന്ന് തന്നെയാണ് പ്രതീക്ഷിക്കുന്നത്. ഈ വരുന്ന ജനുവരി ട്രാൻസ്ഫറിൽ മികച്ച ഒരു മുന്നേറ്റ താരത്തെ ടീമിലേക്ക് എത്തിക്കാനുള്ള ശ്രമത്തിലാണ് ബാഴ്സലോണ.
സെർജിയോ അഗ്യൂറോയുടെ തിരിച്ചുവരവ് ഇനി എന്ന് ഉണ്ടാകും എന്ന് വ്യക്തമല്ല, അതുപോലെ തന്നെ നെതർലാൻഡുകാരനായ മുന്നേറ്റനിര താരം ലുക്ക് ഡി ജോംഗിനെ ഈ ജനുവരി ട്രാൻസ്ഫറിൽ വിട്ടു നൽകാനും സാധ്യതയുള്ളതിനാലും നീണ്ട നാൾ കളത്തിനു പുറത്തിരിക്കുന്ന മറ്റൊരു മുന്നേറ്റനിര താരമായ മാർട്ടിൻ ബ്രൈത്ത്‌വെയ്റ്റിന്റെ അഭാവവും ടീമിന് വലിയ തിരിച്ചടിയാണ് ഇപ്പോൾ നൽകുന്നത്.
അത് മറികടക്കാൻ വേണ്ടിയാണ് ഈ ജനുവരി ട്രാൻസ്ഫറിൽ മികച്ച ഒരു മുന്നേറ്റ താരത്തെ ബാഴ്സലോണ ടീമിൽ എത്തിക്കാൻ ശ്രമിക്കുന്നത്. അതിൽ ഏറ്റവും മുൻപന്തിയിലുള്ളത് മാഞ്ചസ്റ്റർ യുണൈറ്റഡിന്റെ എഡിസൺ കവാനി, മാഞ്ചസ്റ്റർ സിറ്റിയുടെ സ്റ്റെർലിങ്, ചെൽസിയുടെ മുന്നേറ്റ താരം വെർണർ എന്നിവരാണ് ഇപ്പോൾ ബാഴ്സലോണയുടെ പട്ടികയിലുള്ളത്.
മാഞ്ചസ്റ്റർ സിറ്റിയിൽ വേണ്ടത്ര അവസരം ലഭിക്കാത്ത സ്റ്റെർലിങ് ക്ലബ്ബ് വിടാനുള്ള ഒരുക്കത്തിലാണ്, അത് താരം പരസ്യമായി പറയുകയും ചെയ്തിട്ടുണ്ട്. അത് മുന്നിൽകണ്ടുകൊണ്ട് ബാഴ്സലോണ വേണ്ടത്ര പരിഗണന നൽകി ടീമിൽ എത്തിക്കാനുള്ള സാധ്യതയാണ് നിലവിലുള്ളത്.
സ്റ്റെർലിങിനെ ടീമിൽ എത്തിക്കാൻ കഴിഞ്ഞില്ലെങ്കിൽ മാത്രമേ മറ്റ് രണ്ട് ഓപ്ഷനിലേക്ക് ബാഴ്സലോണ കടക്കുകയുള്ളൂ എന്നാണ് പ്രമുഖ മാധ്യമമായ മാർക്ക അടക്കമുള്ളവർ റിപ്പോർട്ട് ചെയ്യുന്നത്.